10 طرق للربح من الأنترنت

بزاف د ناس كايعرفو غي التجارة الالكترونية كطريقة د الربح من الأنترنت و بنادم جاهل بزااااااف ديال الطرق اللي ممكن اعيش و يعيش منهم ! فهاد المقال غادي نهضر على هاد الطرق بشكل عام و اللي بغا التفاصيل ديال كل حاجة، اقلب فالحاج جوجل، راه المعلومة مشتتة غا اللي ما بغاش، أما شناهي أفضل الطرق هاد السؤال نتا الوحيد اللي ممكن تجاوب عليه، حيت كل واحد و فين لقا راحتو.

الربح من الأنترنت ما هو إلا وسيلة من الوسائل ديال التعامل مع الناس، أنك تفهم كيفاش كايفكرو و شنو محتاجين و تعطيه ليهم، راه النتيجة الحتمية هي غادي تخلص على خدمتك بطريقة أو بأخرى. غي ماتعطيش كلشي فابور. 

باش دير الفلوس بسرعة بلا ماتحلم بيها و ايلا جيتي تقرا هاد المقال على هاد الغرض غي رجع دور فالفايسبوك و تغطى تحت المانطة و قلب على اللي اصرف عليك، حيث أول حاجة خاصك ديرها هي تبدل العقلية.

الطريقة الأولى : التجارة الإلكترونية – Ecommerce

التجارة الالكترونية، هي ملي كاتشري السلعة و كاتحطها عندك فالدار و كادير الاشهار، ملي كايطلبوها ليك الناس كاتسيفطها ليهم، و بعدها الليفرور كايتخلص من عند الناس و كايجيب ليك رزقك و كاتعاود نفس البلان. غي خاصك تعرف كيفاش تقاد استراتيجية ناضية للتسويق للمنتوج ديالك.

التجارة الالكترونية هي المعروفة بزاف و كلشي كايتلاح وتا هو بغا ايولي ابيع و يشري و خا بينو و بين التجارة غي الخير و الاحسان. التجارة الالكترونية كاتبقا تجارة و خاصك تعرف أساسيات العرض و الطلب. ماشي دير باج فايسبوك و كاتبقا دير الاشهار هي التجارة، اراااد البال أبن عمي.

الطريقة الثانية : التسويق بالعمولة – Affiliate Marketing

تخايل معايا، جاركم سي المعطي بدا كايبيع الحوايج فالأنترنت، تلاقيتيه واحد نهار فالقهوة فين كاتقيل عاصر ليهم تما على ديك النوار، المهم بديتي كادوي مع السي المعطي، عرفك بللي غي ناشر وماكادير تا وزة فحياتك، قاليك أش بان ليك على كل بياسة بعتيها ليا غادي نعطيك فيها واحد النسبة، فرحتي و بديتي كاتفكر أشنو غاندير باش نجيب المبيعات، تما فين غادي اخصك تقرا على أبجديات التسوق الرقمي.

المهم بديتي كاتبرطاجي فالكروبات و درتي الادس و نهار العيد قلتي لمالين الدار هاد المرة غادي نتقداو عند سي المعطي، سولوك علاش ؟ قلتي ليهم عندو داكشي نقي و جودة عالية و حتى الثمن مناسب … اعلي عليك الكذيذيب. المهم أسيدي ضربتي معاه الصريف و راك فرحان.

هذا هو التسويق بالعمولة، بلاصة سي المعطي ممكن ديرو مع أمازون و أي قرتاحنة ممكنة، و حتا اينوفاجيت، جيب ليها زبون محتاج إدارة السوشل ميديا، و غاتخد 300 درهم حلالا طيبا.

الطريقة الثالثة : دروبشيبينغ – Dropshiping

مصطلح اخر ديال كاتبيع الحوت فالبحر، دبا تخايل التسويق بالعمولة تزوج بالتجارة الالكترونية، كايولدو لينا دروبشيبيغ! 

كادير موقع الكتروني كاتحط فيه صور ديال سلعة، كايجيو ناس كايشريو ديك السلعة -اللي غي تصاور- و عاد نتا كاتمشي تشريها و تسيفطها ليهم. هاد المثال غادي افهمك أكثر :

الطريقة الرابعة : Amazon FBA

هو التجارة الالكترونية اللي فبلاصة دير سطوك عندك فالدار، كاديرو عند أمازون و عوض تعامل مع شي شركة باش دير ليك التوصيل، أسيدي أمازون برايم هي اللي كاتكلف و عوض السلعة ديالك توصل ف 15 يوم، كاتولي توصل فيومين.

نزيد نشرح : اللي كايديرو هاد الطريقة هما فالغالب الناس اللي كايبيعو فميريكان، دونك عوض ايبقا اسيفط كل منتوج من شينوا لوشنطن و ياخد ليه بزاف دالوقت فالتوصيل، شنو كايدير ؟ كايطيح على شي منتوج ناضي و كايشري منو واحد كمية كبيرة و كايسيفطو لميريكان عند سطوك د أمازون، و فينما الناس اشريو عندو، أمازون كاتسيفط ليهم و دغيا كاتوصلهم السلعة و هادشي كايخلي سطور ديالك غادي فالربحان أحمادي.

الطريقة الخامسة : Print On Demand

كي ديما خاصك تعرف شنو الناس باغيين، و بعدها كادير شي تصميم زوين و كاتحطو فمنصات خاصة بهادشي، كاينين نوعين د هاد المنصات :

  • النوع الأول : غي عطيهم الديزاين و نعس على جنب الراحة، هما كايتكلفو بالتسويق و الطباعة و الشحن و التوصيل، طبعا الربح غادي اكون أقل من النوع الثاني.
  • النوع الثاني : كاتصايب ديزاين، و كاتحطو عندهم، هما كايتكلفو غي بالطباعة، الشحن و التوصيل، التسويق كايبقى خاصك ديرو نتا.

اللي خاصك تفهم فهاد الطريقة هما المراحل اللي كادوز منها :

  1. اختيار الموضوع : خاصك تلقا شي حاجة كاتمشى مزيان و فهاد الصدد واحد الصديق ديالي لونسا منصة كاتعاونك تلقا المواضيع الي عليهم الطلب، المنصة سميتها : redbubbler.club
  2. التصميم
  3. التسويق
  4. الطباعة، الشحن و التوصيل

كنت هضرت على Teepublic فواحد المقال فاينوفاجيت، كانوري فيه الخطوات من الألف الى الياء كيفاش تبدا هاد البيزنيس.

الطريقة السادسة : Amazon KDP

تكتب كتاب أو ديزاين ديال شي مذكرة و تحطو فأمازون، كيما ديما خاصك تعرف علاياش كايقلبو الناس بزاف و تعطيه ليهم. كلما كان الترتيب ديالك مزيان فأمازون كلما غاطالع للناس كثر، كلما غايكثرو عندك المبيعات، لكن رد البال راه واخا بعتي ايلا درتي غي تخربيق، الناس كايرجعو فلوسهم و كاطيح فالمستنقع ديال أمازون. يعني دير شي حاجة استافدو منها الناس أولا تخشا فالمانطة و سكتنا.

ملي كاتحط داك الكتاب فامازون، كاتحطو على أساس يا إمااتباع ك ebook أو كتاب مطبوع، كل نوع عندو رباح ديالو مختالف.

الطريقة السابعة : Google Adsense

كاتسمع الناس دارو الفلوس فيوتيوب، روتيني اليومي و داكشي، جزء من الارباح ديال يوتيوب كايجيو من هاد ادسنس. لكن اللي مكايعرفوش الناس هو أن هاد الجزء كايشكل تقريبا 1% من المداخيل د ليوتبرز. اللي بغيتك تعرف هو أن الناس فيوتيوب كايديرو الفلوس ماشي من أدسنس لكن من التسويق بالعمولة أو من الاشهار لشي ماركة معينة.

دبا شناهو أدسنس؟ سواء درتي قناة على اليوتيوب أو مدونة كاتقول لجوجل راه ممكن دير عندي الاشهارات و ملي الزائرين ديالك كايضغطو على داك الاشهار نتا كاتربح واحد ربعة د ريال (حرفيا)، على حساب الرقة الجغرافية اللي كايجيو منها الزائرين ديالك.

راه كاين فرق بين Google Ads و Google Adsense الأول داير بحال فايسبوك أدس غي هو ماكايتسدش بزاف xp، و الثاني هو اللي كايخلصك.

الطريقة الثامنة : الفريلانس – Freelance

كاتقدم الخدمات ديالك بحال التصميم أو الكتابة، مقابل الخلاص راه واضحة. أهم حاجة هو تكون عندك واحد المهارة و طحنها مزيان و كاتسجل فدوك المواقع الخاصة بالفريلانس أشهرهم Fiverr. لكن السؤال الفلسفي المطروح، هو كيفاش قدام واحد المنافسة شرسة (تحية للهنود) دير بلاصتك نتا.

هنا غانعاود ليك قصتي الشخصية، ملي كنت باقي كانقرا، كانو صحابي كايديرو الفريلانس ف فايفر و كل واحد و رزقو المهم غاديين، شي كايدير الديزاين شي كايحل التمارين.. المهم كايطبرو على راسهم فانتظار توصل المنحة. أنا كانتساءل كيفاش ندير واحد الحاجة بعيدا على هاد المنافسة، و هنا طاحت علي الفكرة ديال نبدل “السوق المستهدف” هي أصعب لكن ملي كاتشد كاتولي تبيع بالثمن ديالك.

عوض نمشي لواحد السوق فيه منافسة كثيرة و بالتالي الأثمنة ناقصة بزاف، خدمت المعارف ديالي و اللي محتاج اصايب موقع الكتروني أو إدارة السوشل ميديا، كايولي اجي نيشان عند رشيد.

الفريلانس أو أي خدمة أخرى ملي كاديرها بإتقان كاتولي الخدمة ديالك هي المسوق رقم واحد ليك، و لهذا التواصل و الاتقان هما السر. ها باش كانصحك باش تبدا :

  1. خاصك تخدم فابور باش تبني الصورة ديالك
  2. خلي الناس تعرف اشنو كادير، مافيها تا عيب
  3. عرض الخدمة ديالك فشي كطالوغ (اتلقا مثال ديالي هنا) أو موقع الكتروني (اتلقا مثال ديالي هنا)
  4. كن اجتماعي و هضر مع الناس فالمجموعات الفايسبوكية
  5. سيفط الايميلات للناس اللي كاتعرف، اعرفوالخدمات ديالك
  6. ماتحشمش ملي تهضر على الثمن و ثق فشنو كادير
  7. أبدع ابن عمي

الطريقة التاسعة : الإشهار – Advertising

عندك شي كونط انستاغرام كبير أو شي قناة على اليوتوب، كاتبقا دير مع الشركات تهضر ليهم على المنتوجات ديالهم مقابل واحد الثمن معين. كاين اختلاف مع التسويق بالعمولة، حيت ماكاتخلصش على كل مبيعة درتيها، لكن غي حيت هضرتي عليهم، و هذا هو المصدر رقم واحد ديال دوك الناس اللي عندهم كونط كبير فانسطاغرام.

الطريقة العاشرة : الانخراط الشهري – Subscription Business

مثلا فاينوفاجايت الزبناء كايديرو انخراط شهري باش نقادو ليهم منشورات أسبوعية فالسوشل ميديا ديالهم، كيتهناو منها و مكاتبقاش الصفحات ديالهم خاويين. اينوي أو اورانج كاتعطيك واحد الخدمة و كاتبقا تخلص بالشهر. نفتارضو عندك تجارة الكترونية ديال الخضرة و الناس دارو عندك انخراط شهري باش كل نهار الاحد تسيفط ليهم خنشة ديال الخضرة (ماعرفتش واش كاينة ولكن تصلاح كبيزنيس).

الطريقة الحادي عشرة : التداول

المهم ماعنديش بزاف د المعلومات فهاد الميدان، قلب من عندك و بقشش شوية.

الخلاصة

مكاينش غي هادشي، لكن أغلب هاد الطرق كاتحتاج دراسة معمقة لحاجيات الزبون، خاصك تفهم أبن عمي شنو كايتمشا و شنو غي معمر السوق، و هذا هو الفرق بين اللي دار الحبة و اللي غي كايحاول سيمانة و كايرجع اتباكى و كايبقى مصدع الوقت وا مكاين مايدار.

الربح و العيش من الانترنت راه حقيقي و ماشي غي كذوب. خدم عقلك و خطط مزيان، أهم خطوة فهاد العالم هو تعرف شنو محتاجين الناس، ايلا فهمتي هادي راك ضربتي نص الطريق و النص الاخر حلو ساهل.

ايلا بغيتي تعرف الأثمنة ديال الخدمات اللي كانقوم بيها، جيب دورة فهاد التقديم والسلام عليكم ورحمة الله.